துல் ஹஜ் முதல் 10 நாட்களும் அதன் சட்டங்களும்

அஷ் ஷெய்க் யஹ்யா ஸில்மி ஹஃபிழஹுல்லாஹ்

الحمد لله رب العالمين والصلاة والسلام على من لا نبي بعده أما بعد

துல்ஹஜ் முதல் 10 நாள்களில் நற்செயல்கள் செய்வதன் சிறப்பு

عَنِ النَّبي صلى الله عليه وسلم أَنَّهُ قَالَ مَا الْعَمَلُ فِي أَيَّامِ الْعَشْرِ أَفْضَلَ مِنَ الْعَمَلِ فِي هَذِهِ قَالُوا وَلَا الْجِهَادُ قَالَ " وَلَا الْجِهَادُ، إِلَّا رَجُلٌ خَرَجَ يُخَاطِرُ بِنَفْسِهِ وَمَالِهِ فَلَمْ يَرْجِعْ بِشَيْءٍ

மற்ற நாள்களில் செய்யும் நல்லறம் (துல் ஹஜ்) பத்து நாள்களில் செய்யும் நல்லறத்தை விடச் சிறந்ததல்ல என்று நபி அவர்கள் கூறினார்கள். 'ஜிஹாதை விடவுமா?' என்று நபி ஸல்லல்லாஹு அலைஹி வஸல்லம் அவர்களின் தோழர்கள் கேட்டனர். "தன் உயிரையும் பொருளையும் பணயம் வைத்துப் இரண்டையும் புறப்பட்டு (அல்லாஹ்வின் பாதையில்) இழந்துவிட்டவர் செய்த ஜிஹாதைத் தவிர” என்று நபி ஸல்லல்லாஹு அலைஹி வஸல்லம் அவர்கள் கூறினார்கள்.

ஸஹீஹ் அல்-புஹாரி 969

சிறப்பான பத்து நாட்களும் அதில் செய்வதற்கு ஏவப்பட்ட அமலும்

عَنِ النَّبي صلى الله عليه وسلم أَنَّهُ قَالَ مَا الْعَمَلُ فِي أَيَّامِ الْعَشْرِ أَفْضَلَ مِنَ الْعَمَلِ فِي هَذِهِ قَالُوا وَلَا الْجِهَادُ قَالَ " وَلَا الْجِهَادُ، إِلَّا رَجُلٌ خَرَجَ يُخَاطِرُ بِنَفْسِهِ وَمَالِهِ فَلَمْ يَرْجِعْ بِشَيْءٍ

நபி ஸல்லல்லாஹு அலைஹி வஸல்லம் அவர்கள் கூறினார்கள்: (துல்ஹஜ் மாதத்தின் முதல்) பத்து நாட்களில் மேற்கொள்ளப்படும் அமல்களைவிட அல்லாஹ்வுக்கு மிக விருப்பமானதும் மகத்தானதும் வேறு எதுவும் இல்லை. எனவே அந்தநாட்களில் தஹ்லீல், தக்பீர், தஹ்மீது அதாவது {லா இலாஹ இல்லல்லாஹ், அல்லாஹுஅக்பர், அல்ஹம்து லில்லாஹ்} அதிகமாகக் கூறுங்கள்.

(இமாம் அத்-தபரானியின் முஃஜம் அல்-கபீரில் இடம் பெற்றுள்ளது).

துல் ஹஜ் பத்து நாள்களில் நோன்பு நோற்பது நபி ஸல்லல்லாஹு அலைஹி வஸல்லம் அவர்களின் வழிமுறையா?

عَنْ عَائِشَةَ - رضى الله عنها - أَنَّ النَّبِيَّ صلى الله عليه وسلم لَمْ يَصْمِ الْعَشْرَ .

அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் துல் ஹிஜ்ஜுடைய பத்து நாள்களில் நோன்பு நோற்க மாட்டார்கள் என்று ஆயிஷா அவர்கள் அறிவிக்கிறார்கள்.

ஸஹீஹ் முஸ்லிம் 1176

நபி ஸல்லல்லாஹு அலைஹி வஸல்லம் அவர்கள் அதிகமான நேரத்தை ஆயிஷா ரழியல்லாஹு அன்ஹா அவர்களுடன் கழிக்கக் கூடியவர்களாக இருந்தார்கள் என்பதை நாம் அனைவரும் அறிவோம். நபி ஸல்லல்லாஹு அலைஹி வஸல்லம் அவர்கள் பத்து நாட்கள் தொடர்ச்சியாக நோன்பு வைத்திருந்தால், ஆயிஷா ரழியல்லாஹு அன்ஹா அவர்களுக்கு ஒரு நாளும் மறைந்ததாக இருக்காது. துல் ஹஜ் பத்து நாள்களில் நோன்பு நோற்பது நபி ஸல்லல்லாஹு அலைஹி வஸல்லம் அவர்களின் வழிமுறையல்ல என்று உறுதியாக ஆயிஷா ரழியல்லாஹு அன்ஹா அவர்கள் கூறுகிறார்கள். இதற்கு முரணாக நபி 10நாட்கள் நோன்பு வைத்தார்கள் என்பதற்கு ஒரு ஆதாரப்பூர்வமான ஹதீஸும் கிடையாது. மேற்குறிப்பிட்ட ஹதீஸ் நபி ஸல்லல்லாஹு அலைஹி வஸல்லம் அவர்களின் வார்த்தையாகும் அல்லது நபி ஸல்லல்லாஹு அலைஹி வஸல்லம் அவர்களின் வழிமுறையாகும் என்பதை நாம் அறியலாம். இந்த விஷயத்தில் ஆயிஷா ரழியல்லாஹு அன்ஹா அவர்களுடைய வார்த்தையை புறக்கணிப்பது ஒரு நாளும் முஸ்லிம்களுக்கு அனுமதிக்கப்பட்டதல்ல. எப்படி இருந்தாலும், 10வது நாள் ஹஜ் பெருநாளாகும். அன்று நோன்பு வைப்பதை நபி ஸல்லல்லாஹு அலைஹி வஸல்லம் அவர்கள் தடுத்தார்கள்.

عَنْ أَبِي هُرَيْرَةَ - رضى الله عنه - أَنَّ رَسُولَ اللَّهِ صلى الله عليه وسلم نَهَى عَنْ صِيَامِ يَوْمَيْنِ يَوْمِ الْأَضْحَى وَيَوْمِ الْفِطْرِ .

நபி ஸல்லல்லாஹு அலைஹி வஸல்லம் அவர்கள் இரண்டு நாள்கள் நோன்பு நோற்பதை தடுத்தார்கள், அவை ஈதுல் அழ்ஹா (துல் ஹஜ் 10 வது நாள்) மற்றும் ஈதுல் ஃபித்ர் ஆகும்.

ஸஹீஹ் முஸ்லிம் 1138

துல் ஹஜ் 10 நாட்கள் நோன்பு வைப்பது பற்றிய பலவீனமான அறிவித்தல்கள்

أَخْبَرَنَا أَبُو بَكْرِ بْنُ أَبِي النَّضْرِ قَالَ حَدَّثَنِي أَبُو النَّصْرِ قَالَ حَدَّثَنَا أَبُو إِسْحَقَ الْأَشْجَعِي كُونِي عَنْ عَمْرِو بْنِ قَيْسِ الْمُلَائِي عَنْ الْحُرِ بْنِ الصَّيَّاحِ عَنْ هُنَيْدَةَ بْنِ خَالِدٍ الْخُزَاعِي عَنْ حَفْصَةَ قَالَتْ أَرْبَعٌ لَمْ يَكُنْ يَدَعُهُنَّ النَّبِيُّ صَلَّى اللَّهُ عَلَيْهِ وَسَلَّمَ صِيَامَ عَاشُورَاءَ وَالْعَشْرَ وَثَلَاثَةَ أَيَّامٍ مِنْ كُلِّ شَهْرٍ وَرَكْعَتَيْنِ قَبْلَ الْغَدَاةِ . رواه النسائي

ஆஷூராவுடைய நோன்பு, (துல்ஹஜ் மாதம் முதல்) பத்து நாட்கள் நோன்பு நோற்பது. ஒவ்வொரு மாதத்திலும் மூன்று நாட்கள் நோன்பு நோற்பது, ஃபஜர் தொழுகைக்கு முன்னால் உள்ள இரண்டு ரக்அத்கள் இந்த நான்கு நல்லறங்களையும் நபி ஸல்லல்லாஹு அலைஹி வஸல்லம் அவர்கள் விட்டதே இல்லை என்று ஹஃப்ஸா ரழியல்லாஹு அன்ஹா அவர்கள் அறிவிக்கிறார்கள். (நஸாயீ, இப்னு ஹிப்பான், முஸ்னது அஹ்மது, தப்ரானீ)

இந்தச் செய்தி பலவீனமானது என்று இமாம் நாசிருத்தீன் அல்பானி ரஹிமஹுல்லாஹ் இர்வா அல்-கலீல் என்ற அவர்களுடைய கிதாபில் தீர்ப்பளித்துள்ளார்கள்.

இமாம் அல்பானி ரஹிமஹுல்லாஹ் அவர்கள் இந்த ஹதீஸைப் பற்றி கூறினார்கள். இந்த ஹதீஸுடைய அறிவிப்பாளர்களில் ஒருவரான அபூ இஸ்ஹாக் அல்-அஸ்ஜயீ என்பவர் மஜ்ஹூல் (அறியப்படாதவர்) ஆவார் என்று இமாம் ஸைலாவி ரஹிமஹுல்லாஹ் அவர்கள் நஸ்புர்ராயாவில் குறிப்பிடுகிறார்கள். அதேபோன்று, இமாம் இப்னு ரஜப் அல்- ஹன்பளி ரஹிமஹுல்லாஹ் அவர்கள் 'லதாயிஃப்' என்ற நூலில் பின்வருமாறு கூறுகிறார்கள்: துல் ஹஜ் 10 நாட்களில் நோன்பு வைப்பது, இரவுகளில் தொழுவது, அதிகமான திக்ர்களைச் செய்வது போன்றவைகள் ஆதாரப்பூர்வமான செய்திகளாக வரவில்லை. எனவே அவற்றை செய்வதற்கு குறிப்பிடக் கூடாது. அதேபோன்று,

عَنْ هُنَيْدَةَ بْنِ خَالِدٍ، عَنِ امْرَأَتِهِ، عَنْ بَعْضِ أَزْوَاجِ النَّبِيِّ صلى الله عليه وسلم أَنَّ رَسُولَ الله صلى الله عليه وسلم كَانَ يَصُومُ تِسْعًا مِنْ ذِي الْحِجَّةِ وَيَوْمَ عَاشُورَاءَ وَثَلَاثَةَ أَيَّامٍ مِنْ كُلِّ شَهْرٍ أَوَّلَ اثْنَيْنِ مِنَ الشَّهْرِ وَخَمِيسَيْنِ .

நபி ஸல்லல்லாஹு அலைஹி வஸல்லம் அவர்களுடைய மனைவிகளில் ஒருவர் அறிவிக்கின்றார்கள் : துல் ஹஜ் ஒன்பதாவது நாள், ஆஷுரா மற்றும் ஒவ்வொரு மாதத்தின் மூன்று நாட்கள், மாதத்தின் முதல் இரண்டு திங்கள் மற்றும் வியாழக் கிழமைகளில் நபி ஸல்லல்லாஹு அலைஹி வஸல்லம் அவர்கள் நோன்பு வைப்பவர்களாக இருந்தார்கள்.

(சுனன் நஸாயீ, சுனன் அபிதாவூது)

ஷெய்க் அல்பானி ரஹிமஹுல்லாஹ் அவர்கள் இதனை ஆதாரப்பூர்வமானது என்று கூறியதாக ஸஹீஹ் அபுதாவூதின் பதிப்புகளில் காணமுடிகிறது. அதே நேரத்தில், இர்வா அல்-கலீல் என்ற நூலில் இந்த செய்தி பலஹீனமானது என்று நிரூபித்துள்ளார்கள். இவ்விரண்டையும் பார்க்கும் பொழுது, இந்த செய்தி பலஹீனமானது என்பது தான் சரியான தீர்ப்பாகும்.

இவ்வாறிருக்க, இந்த ஹதீஸின் சில மொழிப் பெயர்ப்புகளில் “تسع” என்ற வார்த்தைக்கு 'ஒன்பது நாட்கள்' என்று மொழிப் பெயர்க்கப்பட்டுள்ளது. அது ஆயிஷா ரழியல்லாஹு அன்ஹா அவர்களின் ஆதாரப்பூர்வமான அறிவிப்பிற்கு முரணாக அமைகிறது. மேலும் “تسع” என்ற வார்த்தைக்கு 'ஒன்பதாவது நாள்' (அதாவது அரஃபா தினம்) என்று மொழிப் பெயர்ப்பது தான் சரியானதாகும்.

அல்லாஹ்வின் நல்லடியார்களே! இவ்வாறிருக்க, பலஹீனமான ஹதீஸ் செய்திகளின் அடிப்படையில் பத்து நாட்கள் நோன்பு வைப்பது என்று பல பத்வாக்கள் இருகின்றன, எனவே, ஆதாரத்தின் அடிப்படையில் செயல்படுவதில் முஸ்லிம்கள் கவனமாக இருந்துக் கொள்ள வேண்டும்.

அரஃபா தினத்தன்று நோன்பு வைப்பதன் சிறப்பு

قَالَ وَسُئِلَ عَنْ صَوْمِ يَوْمِ عَرَفَةَ فَقَالَ " يُكَفِّرُ السَّنَةَ الْمَاضِيَةَ وَالْبَاقِيَةَ “

அரஃபா (துல்ஹஜ் ஒன்பதாவது) நாளில் நோன்பு நோற்பது பற்றிக் கேட்கப்பட்டதற்கு, 'முந்தைய ஓராண்டிற்கும் பிந்தைய ஓராண்டிற்கும் அது பாவப் பரிகாரமாக அமையும்' என்று நபி ஸல்லல்லாஹு அலைஹி வஸல்லம் அவர்கள் கூறினார்கள்.

(ஸஹீஹ் முஸ்லிம் 2152)

குர்பானி கொடுக்கின்றவர்கள் செய்யக் கூடாதவை

عَنْ أُمِّ سَلَمَةَ، قَالَتْ قَالَ رَسُولُ اللَّهِ - صلى الله عليه وسلم - " مَنْ رَأَى مِنْكُمْ هِلَالَ ذِي الْحِجَّةِ فَأَرَادَ أَنْ يُضَحِيَ فَلَا يَقْرَبَنَّ لَهُ شَعَرًا وَلَا ظُفْرًا "

நபி ஸல்லல்லாஹு அலைஹி வஸல்லம் அவர்கள் கூறினார்கள்: உங்களில் யாரேனும் குர்பானி கொடுக்க விரும்பினால் அவர் துல்ஹஜ் பிறை கண்டதிலிருந்து (அறுத்து முடியும்வரை) தன் நகங்களையும் முடிகளையும் களையாதிருக்க வேண்டும்.

முஸ்லிம் 1977, சுனன் இப்னு மாஜா 3150

அல்லாஹ்வே! எங்களுக்கு சத்தியத்தை சத்தியமாக காட்டி அதனை பின்பற்றுவதற்கு சக்தியை தருவாயாக, மேலும் அசத்தியத்தை அசத்தியமாக காட்டி அதனை தவிர்ந்து கொள்வதற்கும் சக்தியைத் தருவாயாக என்று அல்லாஹ்விடத்தில் கேட்டுக் கொள்கின்றோம்.

அல்லாஹ்வே மிக அறிந்தவன்

அல்லாஹ்வை புகழ்ந்தும், இறுதி நபி முஹம்மது ஸல்லல்லாஹு அலைஹி வஸல்லம் அவர்கள் மீது ஸலாமும் ஸலவாத்தும் கூறி எழுதுவது: அபு அப்துர் ரஹ்மான் யஹ்யா ஸில்மி பின் முஹம்மது நூபார் பின் உஸ்மான் பின் நூஹ் லப்பை ஆல மரிக்கார் அஸ் ஸைலானி அல் யமனி அஸ் ஸலஃபி அல் அஸரி. நபி ஸல்லல்லாஹு அலைஹி வஸல்லம் அவர்கள் மதினாவிற்கு ஹிஜ்ரத் செய்ததிலிருந்து 23 துல் கஅதா 1439 வருடத்தில் எழுதப்பட்டது.