1. உழ்ஹிய்யா என்றால் என்ன?

ஹஜ்ஜுக்கு செல்லாதவர்கள் அல்லாஹ்விற்காக அறுத்துப் பலியிடும் குர்பானிக்கு பெயர் தான் உழ்ஹிய்யா ஆகும். இதனை ஈதுல் அழ்ஹாவின் நாளிலோ அல்லது ஈதுப் பெருநாளை தொடர்ந்து மூன்று நாட்கள் வரும் தஷ்ரீக்கின் நாட்களிலோ கொடுக்கலாம்.

குறிப்பு: துல்ஹஜ்ஜு மாதத்தில் மூன்று விதமான குர்பானிகள் கொடுக்கப்படும். ஒன்று ஹத்யு, இது ஹஜ்ஜுக்கு சென்ற மக்கள் கொடுக்கக் கூடிய குர்பானி, இரண்டாவது ஹத்யுல் முஹ்ஸிர், இது ஹஜ்ஜுக்கு சென்று ஹஜ்ஜு செய்ய முடியாமல் தடுக்கப்பட்டவர்கள் கொடுப்பது, மூன்றாவது உழ்ஹிய்யா இது ஹஜ்ஜுக்கு செல்லாதவர்கள் கொடுப்பது. பார்க்க - ஸூரத்துல் பகரா - 196

2. உழ்ஹிய்யா குடும்பத்திற்கான சட்டம், தனி நபருக்கு அல்ல

عَنْ عَطَاءِ بْنِ يَسَارٍ، قَالَ سَأَلْتُ أَبَا أَيُّوبَ الأَنْصَارِيَّ كَيْفَ كَانَتِ الضَّحَايَا فِيكُمْ عَلَى عَهْدِ رَسُولِ اللَّهِ ـ صلى الله عليه وسلم ـ قَالَ كَانَ الرَّجُلُ فِي عَهْدِ النَّبِيِّ ـ صلى الله عليه وسلم ـ يُضَحِّي بِالشَّاةِ عَنْهُ وَعَنْ أَهْلِ بَيْتِهِ

அதா இப்னு யாஸிர் ரழியல்லாஹு அன்ஹுஅறிவிக்கிறார்கள்:

நான் அபு அய்யூப் அல்-அன்ஸாரி ரழியல்லாஹு அன்ஹு அவர்களிடம் “அல்லாஹ்வின் தூதருடைய காலத்தில் எவ்வாறு உழ்ஹிய்யா (குர்பான்) உங்களுக்கு மத்தியில் கொடுக்கப்பட்டது?” என்று கேட்டேன். அதற்கவர்கள் கூறினார்கள்: “அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்களின் காலத்தில் ஒரு மனிதன் தனக்காகவும், தன் குடும்பத்தாருக்காகவும் ஒரு ஆட்டை குர்பான் செய்திடுவார்…….”

ஸுனன் இப்னு மாஜா 3147

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஸஹீஹ் என்று தன்னுடைய ஸஹீஹ் ஸுனன் இப்னு மாஜா என்ற நூலில் ஹதீஸ் எண்:2563ல் பதிவு செய்துள்ளார்கள்

குறிப்பு: மேலே குறிப்பிடப்பட்ட நபிமொழிக்கு தக்க உழ்ஹிய்யா என்பது தனி ஒரு முஸ்லிமின் மீதான கடமை அல்ல. மாறாக ஒவ்வொரு குடும்ப ரீதியான கடமையாகும். ஒரு குடும்பம் என்பது தந்தை, தாய், மற்றும் திருமணமாகாத குழந்தைகள். குழந்தைகளுக்கு திருமணமாகிவிட்டால் அவர்கள் ஒவ்வொருவரும் தனி ஒரு குடும்பமாக கருதப்படுவார்கள்.

3. வசதியுள்ளவர்களுக்கு தான் உழ்ஹிய்யா கொடுப்பது கடமை

عَنْ أَبِي هُرَيْرَةَ، أَنَّ رَسُولَ اللَّهِ ـ صلى الله عليه وسلم ـ قَالَ ‏ "‏ مَنْ كَانَ لَهُ سَعَةٌ وَلَمْ يُضَحِّ فَلاَ يَقْرَبَنَّ مُصَلاَّنَا"

அபு ஹுரைரா ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் கூறினார்கள்: “யார் வசதி இருந்தும் குர்பான் கொடுக்கவில்லையோ, அவர் எங்களுடைய தொழும் இடங்களை (முஸல்லாவை) நெருங்க வேண்டாம்”

ஸுனன் இப்னு மாஜா 3123

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஹஸன் என்று தன்னுடைய ஸஹீஹ் ஸுனன் இப்னு மாஜா என்ற நூலில் ஹதீஸ் எண்:2549ல் பதிவு செய்துள்ளார்கள்

குறிப்பு: மேலே குறிப்பிடப்பட்ட நபிமொழிக்கு தக்க குர்பான் கொடுப்பதற்கு ஒரு பிராணி வாங்க வசதி இல்லாதவர்களுக்கு கடமை இல்லை.

4. அன்ஆம் எனப்படும் கால்நடைப் பிராணிகள் தான் குர்பான் கொடுக்க வேண்டும்

قوله تعالى: وَلِكُلِّ اُمَّةٍ جَعَلْنَا مَنْسَكًا لِّيَذْكُرُوا اسْمَ اللّٰهِ عَلٰى مَا رَزَقَهُمْ مِّنْۢ بَهِيْمَةِ الْاَنْعَامِ

அல்லாஹ் (سبحانه وتعالى) கூறுகின்றான்:

(ஆடு, மாடு, ஒட்டகம் ஆகிய) கால்நடைப் பிராணிகளிலிருந்து அவன் அவர்களுக்கு கொடுத்திருக்கின்றவற்றின் மீது அல்லாஹ்வின் பெயரை அவர்கள் கூறுவதற்காக ஒவ்வொரு சமூகத்தாருக்கும் குர்பானி செய்வதை நாம் ஏற்படுத்தியிருந்தோம்

ஸுரத்துல் ஹஜ் - 34

மேலே குறிப்பிடப்பட்ட ஆயத்திற்கு தக்க, அன்ஆம் எனப்படும் கால்நடைப் பிராணிகளான ஆடு, மாடு, மற்றும் ஒட்டகம் மட்டும் தான் உழ்ஹிய்யா போன்ற வணக்க ரீதியான குர்பானிற்கு பயன்படுத்த வேண்டும். அல்லாஹ்வின் தூதரோ, ஸஹாபாக்களோ இந்த பிராணிகளைத் தவிர வேறு பிராணிகளைக் கொண்டு குர்பான் கொடுத்ததில்லை.

5. முசின்னா (இரண்டு பெரிய பற்கள்) அல்லது அதற்கு மேல் உள்ள பிராணிகள் மட்டும் தான் குர்பானிற்கு அனுமதி

عَنِ الْبَرَاءِ بْنِ عَازِبٍ كَانَ أَبُو بُرْدَةَ بْنُ نِيَارٍ قَدْ ذَبَحَ فَقَالَ عِنْدِي جَذَعَةٌ خَيْرٌ مِنْ مُسِنَّةٍ فَقَالَ رَسُولُ اللَّهِ صلى الله عليه وسلم ‏"‏ اذْبَحْهَا وَلَنْ تَجْزِيَ عَنْ أَحَدٍ بَعْدَكَ"

பராஅ இப்னு ஆஸிப் ரழியல்லாஹு அன்ஹு அறிவிக்கிறார்கள்:

அபு புர்தா இப்னு நியார் ஈது தொழுகைக்கு முன்னால் பிராணியை அறுத்துவிட்டதால், “என்னிடம் ஜுதஆ (பால் பற்கள் கொண்ட) ஆடு உள்ளது அது ஒரு முசின்னா (இரண்டு பெரிய பற்கள் கொண்ட) ஆடை விட சிறந்ததாகும்” என்று கூறினார். அதற்கு அல்லாஹ்வின் தூதர் ஸல்லல்லாஹு அலைஹி வ ஸல்லம் கூறினார்கள்: “(நீங்கள் முன்னர் அறுத்ததற்கு பகரமாக) அதனை அறுத்துக் கொள்ளுங்கள், ஆனால் உங்களுக்கு பின்னால் வேறு யாருக்கும் அது (ஜுதஆ பிராணி) குர்பான் கொடுப்பதற்கு போதுமானதாக இருக்காது”

ஸஹீஹ் முஸ்லிம் 1961

குறிப்பு: வணக்க ரீதியான குர்பானில் தேர்வு செய்யப்படும் ஆடு, மாடு, அல்லது ஒட்டகத்தில் அதனுடைய கீழ் தாடையில் குறைந்த பட்சம் இரண்டு பெரிய பற்கள் இருக்க வேண்டும். பிராணியின் வயதை பற்களின் எண்ணிக்கையை வைத்து தான் கணக்கிட வேண்டும், ஆண்டுகளைக் கொண்டு கணக்கிடக் கூடாது.

6. குருடான, நோயுள்ள, நொண்டியான, மற்றும் புத்தி ஸ்வாதீனம் இல்லாத பிராணிகள் குர்பானிற்கு தடை

عَنْ عُبَيْدِ بْنِ فَيْرُوزَ، قَالَ سَأَلْتُ الْبَرَاءَ بْنَ عَازِبٍ مَا لاَ يَجُوزُ فِي الأَضَاحِي فَقَالَ قَامَ فِينَا رَسُولُ اللَّهِ صلى الله عليه وسلم فَقَالَ ‏"‏ أَرْبَعٌ لاَ تَجُوزُ فِي الأَضَاحِي الْعَوْرَاءُ بَيِّنٌ عَوَرُهَا وَالْمَرِيضَةُ بَيِّنٌ مَرَضُهَا وَالْعَرْجَاءُ بَيِّنٌ ظَلْعُهَا وَالْكَسِيرُ الَّتِي لاَ تَنْقَى ‏"

உபைது இப்னு ஃபைரூஸ் ரழியல்லாஹு அன்ஹு அறிவிக்கிறார்கள்:

நான் பராஅ இப்னு ஆஸிப் ரழியல்லாஹு அன்ஹு அவர்களிடம் “எந்த பிராணிகள் குர்பானிற்கு தடை?” என்று கேட்டேன். அதற்கவர்கள் கூறினார்கள்: அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் எங்களுக்கு மத்தியில் நின்று கொண்டு கூறினார்கள்: “நான்கு வகை பிராணிகள் குர்பானிற்கு அனுமதி இல்லை. கண் குருடானது அந்த குருட்டுத் தன்மை தெளிவாகத் தெரிவது, நோயுள்ளது அந்த நோயின் தன்மை தெளிவாக உள்ளது, நொண்டியானது அந்த நொண்டித் தன்மை தெளிவாகத் தெரிவது, மற்றும் புத்தி ஸ்வாதீனம் இல்லாதது”.

ஸுனன் அபு தாவூது 2802

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஸஹீஹ் என்று தன்னுடைய ஸஹீஹ் ஸுனன் அபி தாவூது என்ற நூலில் ஹதீஸ் எண்:2497ல் பதிவு செய்துள்ளார்கள்

7. குர்பானி பிராணிகளை நன்கு கொழுக்க வைப்பது சிறந்தது

عَنِ ابْنِ عُمَرَ، أَنَّ النَّبِيَّ صلى الله عليه وسلم كَانَ يَنْحَرُ أَوْ يَذْبَحُ بِالْمُصَلَّى‏.

யஹ்யா இப்னு ஸயீது ரழியல்லாஹு அன்ஹு அறிவிக்கிறார்கள்:

அபி உமாமா இப்னு ஸஹ்ல் ரழியல்லாஹு அன்ஹு அவர்கள் கூற நான் கேட்டேன்: “நாங்கள் மதினாவில் குர்பானி பிராணிகளை நன்கு கொழுக்க வைப்போம் மேலும் அனைத்து முஸ்லிம்களும் குர்பானி பிராணிகளை கொழுக்க வைப்பவர்களாக இருந்தார்கள்”

ஸஹீஹ் அல்-புகாரீ (கிதாபுல் அழாஹி - பாடம் 7)

8. குர்பான் கொடுப்பவர்கள் நகங்களையும் முடிகளையும் வெட்டக் கூடாது

عَنْ أُمِّ سَلَمَةَ، أَنَّ النَّبِيَّ صلى الله عليه وسلم قَالَ ‏ "‏ إِذَا دَخَلَتِ الْعَشْرُ وَأَرَادَ أَحَدُكُمْ أَنْ يُضَحِّيَ فَلاَ يَمَسَّ مِنْ شَعَرِهِ وَبَشَرِهِ شَيْئًا ‏"

உம்மு ஸலமா ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் கூறினார்கள்: “உங்களில் யாரேனும் குர்பானி கொடுக்க விரும்பினால் அவர் துல்ஹஜ் பிறை கண்டதிலிருந்து (அறுத்து முடியும்வரை) தன் நகங்களையும் முடிகளையும் களையாதிருக்க வேண்டும்”

ஸஹீஹ் முஸ்லிம் 1977

9. ஈது தொழுகைக்குப் பின் குர்பான் கொடுக்க வேண்டும்

عَنْ أَنَسِ بْنِ مَالِكٍ، قَالَ قَالَ النَّبِيُّ صلى الله عليه وسلم يَوْمَ النَّحْرِ ‏ "‏ مَنْ كَانَ ذَبَحَ قَبْلَ الصَّلاَةِ فَلْيُعِدْ ‏"‏‏

அனஸ் இப்னு மாலிக் ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் ஈதுடைய நாளில் கூறினார்கள்: “உங்களில் யாரேனும் ஈது தொழுகைக்கு முன்னால் குர்பான் கொடுத்துவிட்டால், அவர் மீண்டும் ஒரு பிராணியை அறுத்து குர்பான் கொடுக்கட்டும்”

ஸஹீஹ் அல்-புகாரீ 5549

10. ஈது முஸல்லாவில் குர்பான் கொடுப்பது சிறந்தது

عَنِ ابْنِ عُمَرَ، أَنَّ النَّبِيَّ صلى الله عليه وسلم كَانَ يَنْحَرُ أَوْ يَذْبَحُ بِالْمُصَلَّى‏.

அப்துல்லாஹ் இப்னு உமர் ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் ஈது முஸல்லாவில் அறுத்துப் பலியிடுவார்கள்

ஸஹீஹ் அல்-புகாரீ 982

11. கால்களை பிராணியின் மடி மீது வைத்து பிஸ்மில்லாஹி அல்லாஹு அக்பர் என்று கூறி அறுக்க வேண்டும்

عَنْ أَنَسٍ، قَالَ ضَحَّى النَّبِيُّ صلى الله عليه وسلم بِكَبْشَيْنِ أَمْلَحَيْنِ، فَرَأَيْتُهُ وَاضِعًا قَدَمَهُ عَلَى صِفَاحِهِمَا يُسَمِّي وَيُكَبِّرُ، فَذَبَحَهُمَا بِيَدِهِ‏.

அனஸ் இப்னு மாலிக் ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் இரண்டு வென்மையான செம்மறி ஆடுகளை குர்பான் கொடுத்தார்கள். அவர்கள் தன்னுடைய கால்களை பிராணியின் மடி மீது வைத்து, "பிஸ்மில்லாஹி அல்லாஹு அக்பர் என்று கூறி தங்களுடைய கைகளால் அறுத்துப் பலியிட்டார்கள்”

ஸஹீஹ் அல்-புகாரீ 5558

குறிப்பு: உழ்ஹிய்யா கொடுக்க நாடியவரே தன்னுடைய கைகளால் அறுப்பது சிறந்ததாகும். அறுப்பதற்கு முன்னால் பிஸ்மில்லாஹி அல்லாஹு அக்பர் என்று கூறி அறுக்க வேண்டும்.

12. கூர்மையான கத்தியைக் கொண்டு கழுத்து நரம்பில் அறுத்து இரத்தத்தை வெளியேற்ற வேண்டும்

عن رافِعِ بنِ خَديجٍ رَضِيَ الله عنه أنَّ النبيَّ صلَّى اللهُ عليه وسلَّم قال مَا أَنْهَرَ الدَّمَ وَذُكِرَ اسْمُ اللَّهِ عَلَيْهِ، فَكُلُوهُ، لَيْسَ السِّنَّ وَالظُّفُرَ، وَسَأُحَدِّثُكُمْ عَنْ ذَلِكَ، أَمَّا السِّنُّ فَعَظْمٌ وَأَمَّا الظُّفُرُ فَمُدَى الْحَبَشَةِ ‏"‏‏

ராஃபிஃ இப்னு ஹதீஜ் ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் கூறினார்கள்: “எதுவெல்லாம் இரத்தத்தை வெளியேற்றுமோ அதை பயன்படுத்துங்கள், இன்னும் அறுக்கும் போது அல்லாஹ்வின் பெயரை கூறி அறுக்கப்படிருந்தால் மட்டும் அதனை உண்ணுங்கள். பற்களை வைத்தோ நகங்களை வைத்தோ அறுக்காதீர்கள் அதை ஏன் என்று நான் உங்களுக்கு விளக்குகிறேன்: பற்கள் என்பது வெறும் எலும்புகளாகும் (அவை சரியாக அறுக்காது) மேலும் நகங்கள் ஹபஷியர்கள் பயன்படுத்தும் ஆயுதமாகும் (நாம் ஹபஷி காஃபிர்களை போல் செய்யக் கூடாது)”

ஸஹீஹ் அல்-புகாரீ 2488

குறிப்பு: அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் “எதுவெல்லாம் இரத்தத்தை வெளியேற்றுமோ அதை பயன்படுத்துங்கள்” என்ற ஏவலுக்கு தக்க நாம் கூர்மையான கத்தியைக் கொண்டு கழுத்து நரம்பு அறுபடும் அளவிற்கு அறுக்க வேண்டும். அது தான் முழுமையாக இரத்தத்தை வெளியேற்றும். மேலும் எலும்புகள் நகங்கள் கொண்டு அறுக்கக்கூடாது. அபு தாவூதின் 2815வது ஹதீஸிற்கு தக்க அறுக்கும் போது நல்ல வழிமுறையில் பிராணியை துன்புறுத்தாமல் மென்மையாக அறுக்க வேண்டும். ஷெய்க் அல்பானி இந்த ஹதீஸை ஸஹீஹ் என்று தீர்ப்பளித்துள்ளார்கள்.

13. குர்பானி கறியை சாப்பிடலாம், சேமிக்கலாம், அல்லது தர்மம் செய்யலாம்

عَنْ عَمْرَةَ بِنْتِ عَبْدِ الرَّحْمَنِ، قَالَتْ سَمِعْتُ عَائِشَةَ تَقُولُ قَالَ رَسُولُ اللَّهِ صلى الله عليه وسلم: "فَكُلُوا وَتَصَدَّقُوا وَادَّخِرُوا"

அம்ரா பின்த் அப்துர் ரழியல்லாஹு அன்ஹா அறிவிக்கிறார்கள்:

நான் ஆயிஷா ரழியல்லாஹு அன்ஹா கூறியதை கேட்டேன், அவர்கள் அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் சொன்னதாக கூறினார்கள்: “அதை (குர்பானி கறியை) நீங்கள் சாப்பிடுங்கள், சேமித்துக் கொள்ளுங்கள், தர்மம் செய்யுங்கள்”

ஸுனன் அபு தாவூது 2802

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஸஹீஹ் என்று தன்னுடைய ஸஹீஹ் ஸுனன் அபி தாவூது என்ற நூலில் ஹதீஸ் எண்:2503ல் பதிவு செய்துள்ளார்கள்

குறிப்பு: ஒருவர் குர்பானி கறியை முழுவதுமாக வைத்துக் கொள்ளவும் அனுமதி உள்ளது, அல்லது சேமிக்கவும் பங்கிடவும் அனுமதி உள்ளது.

14. குர்பானி கறியை காஃபிர்களுக்கு கொடுக்கக் கூடாது

عَنْ أَبِي سَعِيدٍ، عَنِ النَّبِيِّ صلى الله عليه وسلم قَالَ ‏ "‏ لاَ تُصَاحِبْ إِلاَّ مُؤْمِنًا وَلاَ يَأْكُلْ طَعَامَكَ إِلاَّ تَقِيٌّ ‏"

அபு ஸயீது அல்-குத்ரீ ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் கூறினார்கள்: “ஒரு முஃமினை தவிர வேறு யாரையும் நீங்கள் தோழமை கொள்ள வேண்டாம், உங்கள் உணவுகளை தக்வா உடையவர்களை (முஸ்லிம்களை) தவிர வேறு யாரும் உண்ண வேண்டாம்”

ஸுனன் அபு தாவூது 4832

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஸஹீஹ் என்று தன்னுடைய ஸஹீஹ் அல்-ஜாமிஃ என்ற நூலில் ஹதீஸ் எண்:7341ல் பதிவு செய்துள்ளார்கள்

குறிப்பு: இந்த ஹதீஸ் காஃபிர்களுக்கு குர்பானி கறியை பங்கிடுவதற்கு தடை செய்கிறது.

15. தஷ்ரீக்கின் நாட்களிலும் குர்பான் கொடுக்கலாம்

عن جبير بن مطعم أنه صلى الله عليه وسلم قال: "كل أيام التشريق ذبح"

ஜுபைர் இப்னு முத்இம் ரழியல்லாஹு அன்ஹு அறிவிக்கிறார்கள்:

அல்லாஹ்வின் தூதர் ஸல்லல்லாஹு அலைஹி வ ஸல்லம் அவர்கள் கூறினார்கள்: “தஷ்ரீக்கின் நாட்கள் அனைத்துமே அறுத்துப் பலியிடும் நாட்களாகும்”

முஸ்னது அஹ்மது

அஷ்-ஷெய்க் அல்-அல்பானி ரஹிமஹுல்லாஹ் அவர்கள் இந்த ஹதீஸை ஸஹீஹ் என்று தன்னுடைய ஸில்ஸிலத்துல் அஹாதீஸ் அஸ்-ஸஹீஹா என்ற நூலில் ஹதீஸ் எண்:2476ல் பதிவு செய்துள்ளார்கள்

குறிப்பு: தஷ்ரீக்கின் நாட்கள் என்பது துல் ஹஜ் மாதத்தின் 11, 12, மற்றும் 13வது நாட்களாகும்.

உழ்ஹிய்யா குர்பானியின் சட்டங்கள்