الحمد لله رب العالمين والصلاة والسلام على من لا نبي بعده اما بعد،

முஸ்லிம் கூட்டங்களும் இயக்கங்களும் தங்களுக்கு சூட்டிக் கொண்ட பெயர்களில் இருக்கின்ற சிறப்பும் பண்பும், அவர்களது கொள்கையிலும், நடவடிக்கையிலும், அழைப்பு பணியிலும் பிரதிபலிக்கவில்லை என்பதுதான் இன்றைய நிலைமை.

"ஹனபீகளோ ஷாபிகளோ அல்லது நவீன தாவா இயக்கங்களும், இதில் யாராக இருந்தாலும் சரியே!"

அல்லாஹ் சுப்ஹானஹு வ த ஆலா கூறுகிறான்,

وَأَنَّ ٱلْمَسَـٰجِدَ لِلَّهِ فَلَا تَدْعُوا۟ مَعَ ٱللَّهِ أَحَدًۭا

மேலும், நிச்சயமாக மஸ்ஜிதுகள் அல்லாஹ்வின் வணக்கத்திற்கே உரியன; ஆகவே, (அவைகளில்) அல்லாஹ்வுடன் மற்றெவரையும் நீங்கள் (பிரார்த்தித்து) அழைக்க வேண்டாம். (72:12)

நிச்சயமாக மஸ்ஜிதுகள் அல்லாஹ்விற்கானது மட்டுமே. அங்கே அவன் மட்டுமே இனை துணை இன்றி வணங்கப்பட வேண்டும். வணக்கத்திற்கு தகுதியான ஒரே ஒரு ரப்புல் ஆலமீனான அல்லாஹ்வை வணங்கவும் அதனை நோக்கி மக்களை அழைக்கவும் தான் நம்முடைய பள்ளிவாசல்கள் பயன்பட வேண்டும். நம்முடைய முஸ்லிம் சமுதாயம் அல்லாஹ்வுடைய உரிமைகளை படித்து அதனை பாதுகாக்காமல் தங்களுடைய உரிமைகளை மட்டும் பாதுகாத்துக் கொள்ள முடியும் என்று எண்ணுகிறார்களா?!

அப்படியானால் இது மிகவும் முட்டாள்தனமான முடிவாகும்.

இது தோல்விக்கான பாதையாகும்.

இது வழிகெட்ட நரக பாதை ஆகும்.

இது நம் சமூகத்தின் அறியாமையை தவிர வேறொன்றும் இல்லை.

இணைவைப்பு, குஃபுர், பித்அத், பெரும் பாவம் ஆகிய அனைத்தையும் உள்ளடக்கிய இன்றைய நவீன கால அரசியல்களையும், இந்த அநியாயங்களில் ஈடுபடும் முஸ்லிம் அரசியல்வாதிகளையும் நோக்கி அழைப்பதற்கு தான் அல்லாஹ்விற்கான பள்ளிகளா?!

அல்லாஹ்வின் உரிமையை பாதுகாத்தால் மட்டும்தான் அல்லாஹ் நம்முடைய உரிமையை பாதுகாப்பான்.

ஆனால் இன்று உலமாக்களும் அழைப்பாளர்களும் கூட முஷ்ரிக்குகளை (இணைவைப்பாளர்களை) கண்டு பயப்படுகிறார்கள். அல்லாஹ்வின் மீது வைக்க வேண்டிய அச்சத்தையும், பாதுகாவலன் அல்லாஹ் மட்டும்‌ தான் என்பதையும் மறந்துவிட்டு, இஸ்லாமிய கொள்கையையும், தங்களுடைய ஈமானையும் சமூகத் தலைவர்களிடமும் அரசியல்வாதிகளிடமும் ஒப்படைத்து விட்டார்கள்.

இந்த ஷிர்க் என்ற இணைவப்பு நோய் எந்த அளவிற்கு முஸ்லிம் சமூகத்தில் ஊடுருவி விட்டது என்றால், அகீதா (கொள்கை) பாடங்களை முஸ்லிம் மாணவர்களுக்கு பயிற்றுவிக்கும் ஆசிரியர்களே கூறுகிறார்கள்,

"சமூக பாதுகாப்பிற்காக நாம் அரசியல், ஊடகம் போன்ற பல துறைகளில் பயணிக்க வேண்டும். அந்த இடத்தில் நாம் உசூல் (மார்க்கதின் அடிப்படைகளை) பேசக் கூடாது" என்கிறார்கள்.

தவ்ஹீதையும் சுன்னாவையும் எடுத்துரைத்தால் நம்முடைய ஜமாத் அல்லது அமைப்பின் ஒற்றுமை உடைந்து விடும் என்கிறார்கள்.

இவர்கள் முஸ்லிம்களுக்கு என்று ஜமாஅத்துகளையும் அமைப்புகளையும் உருவாக்கி நிர்வகிப்பதே எதற்காக என்று புரியவில்லை?! இவர்களெல்லாம் தாங்கள் கூறிய ஷஹாததிற்கு உண்மையானவர்களா?! என்ற கேள்வி எழுகிறது.

அல்லாஹ் நம் அனைவரையும் பாதுகாப்பானாக.

முஸ்லிம்களே! அல்லாஹ்வுடைய வீட்டில் அல்லாஹ் மட்டுமே வணங்கப்பட வேண்டும். அவனுடைய பாதுகாப்பை பெறுவதற்கு மட்டுமே நாம் உழைக்க வேண்டும். அவனுடைய உரிமையை மட்டுமே நாம் பாதுகாக்க வேண்டும். அவனிடம் மட்டுமே பாதுகாவல் தேட வேண்டும்.

அல்லாஹ் சுபுஹானஹு வ த ஆலா நமக்கு பாதுகாப்பு அளிக்கவில்லை என்றால் வேறு எவராலும் நமக்கு பாதுகாப்பு அளிக்க முடியாது என்ற ஈமானிய கல்வியை சுத்தமாக மக்களுக்கு குடுக்க வேண்டும்.

இவை அனைத்தையும் மறந்து விட்டு, இணைவைப்பாளர்கள் மீதான பயத்தை பரப்புவது, தங்களுடைய ஜமாஅத்தை வளர்ப்பது, போலி வாக்குறுதிகளை நம்பும் படி முஸ்லிம்களை அழைப்பது, அல்லாஹ்வின் உரிமையை மறப்பது, தங்களையும் ஏமாற்றிக் கொண்டு பிறரையும் ஏமாற்றுவது, மேலும் இவை அனைத்திற்கும் இஸ்லாமிய போர்வையை அணிவித்து நபி மற்றும் ஸஹாபாக்களின் மீது இட்டுக் கட்டுவது போன்ற அனைத்தையும் விட்டு நம்முடைய பள்ளிகள் சுத்தமாக வேண்டும்.

اِیَّاكَ نَعْبُدُ وَاِیَّاكَ نَسْتَعِیْنُ

(எங்கள் இரட்சகா!) உன்னையே நாங்கள் வணங்குகிறோம்; உன்னிடமே நாங்கள் உதவியும் தேடுகிறோம்.(1:5)

என்று நாம் அல்லாஹ்விடம் ஒவ்வொரு தொழுகையிலும் கேட்பதை நடைமுறைப்படுத்தினால் மட்டும் தான், முஸ்லிம்களாகிய நாம் வாழ்க்கையில் வெற்றியையும் பாதுகாப்பையும் பெற முடியும்.

தவ்ஹீதை மறந்து, அல்லாஹ்வுடைய உரிமையை மறந்தவர்கள் ஒரு நாளும் தங்களுடைய உரிமையை பெற முடியாது என்பதை நாம் தெளிவாக புரிந்து கொள்ள வேண்டும்.

அல்லாஹ்வுடைய பள்ளிவாசலை சுத்தமாக வைத்து, அவனுக்கு எவ்வித இணையும் கற்பிக்காமல் சுத்தமாக வணங்கி, அவனை மட்டுமே பயந்து அவனிடம் மட்டுமே பாதுகாப்பு தேடி, அவனுடைய திருப்திக்காகவே அழைப்பு பணி செய்து வாழ்வது தான் நமக்கான நிம்மதியையும் பாதுகாப்பையும் பெற்றுத் தரும்.

அல்லாஹ்வே மிக அறிந்தவன்.

-----------------------------

அஷ் ஷெய்க் யஹ்யா ஸில்மி ஹஃபிழஹுல்லாஹ் அவர்களின் வழிகாட்டுதலில் வெளியிடப்படுகிறது

அஹ்லுஸ் ஸுன்னாஹ் அஹ்லுல் ஹதீஸ் ஸலஃப் பாதையை குறித்து தெளிவுகளுக்கு:

உஸ்தாத். அப்துஸ் ஸமது - +91 91599 69481

உஸ்தாத். மீரான் கனி - +91 90472 79622

அஷ் ஷெய்க் யஹ்யா ஸில்மி - +94722 251277

இஸ்லாமிய கூட்டங்களே!இயக்கங்களே! மஸ்ஜிதுகள் அல்லாஹ்விற்காக மட்டுமே என்பதை மறந்து விட்டீர்களா?!!!