ஈமானில் உறுதியாகினால் சமூகம் சீர்திருத்தம் பெறும்!

அஷ்-ஷெய்க் யஹ்யா ஸில்மி அஸ்-ஸைலானி ஹஃபிழஹுல்லாஹ்

الحمد لله رب العالمين والصلاة والسلام على من لا نبي بعده اما بعد

இன்றைய இஸ்லாமிய உம்மத், உலகத்தின் நிலையைப் பார்த்து, ஒவ்வொரு முஸ்லிமும் பல விஷயங்களுக்கு தங்களுடைய கருத்துகளாகவும், கவலைகளாகவும், துக்கங்களாகவும், ஆதரவாகவும், எதிர்ப்பாகவும் குரல் எழுப்புகிறார்கள்.

அஷ்ஷெய்க் முஹம்மத் அமான் அல்-ஜாமிஃ ரஹ்மத்துல்லாஹி அலைஹி அவர்கள் கூறிய உபதேசத்தை, இன்றைக்கு நான் இந்த இடத்தில் எடுத்துவைக்க ஆசைப்படுகிறேன்.

“வாலிபர்களே! அல்குர்ஆன் மற்றும் அஸ்-ஸுன்னாஹ்வின் கல்வியைப் படியுங்கள். இந்த அரசியல் விஷயங்கள் உங்களுடைய புரிதலுக்கு எட்டாது (எனவே அரசியலை தவிர்த்திடுங்கள்).”

சகோதரர்களே, முஸ்லிம்களுக்காகக் கஷ்டப்பட்டு, முஸ்லிம்களின் தேவைகளைக் கருதி, முஸ்லிம்களின் அனைத்து நிலைகளையும் கவனித்துப் பேசுபவரும், முஸ்லிம்களின் பொறுப்புகளையும் விஷயங்களையும் அறியாமல், கண்ணால் காணும் காட்சிகளை மட்டும் பார்த்துப் பேசுபவரும் சமமாக மாட்டார்கள்.

அரசியல் என்பது ஆட்சியாளர்களால் எடுக்கப்படும் சில நடவடிக்கைகள், முடிவுகள். ஒவ்வொரு ஆட்சியாளரும் தமது முடிவுகளைப் பல விஷயங்களைக் கருத்தில் கொண்டு எடுப்பார்கள். முஸ்லிம் ஆட்சியாளர்களாக உள்ளவர்கள் இஸ்லாமியக் கருத்துக்களை அடிப்படையாகக் கொண்டு தான் முடிவுகளை எடுப்பார்கள், அதை நிரகரித்துவிட்டு அல்ல!

ஆனாலும் அந்நியர்கள் நம்மை அவர்களுக்கு (அந்த ஆட்சியாளர்களுக்கு) எதிர்ப்பாகத் திசை திருப்பி, முஸ்லிம் உம்மத்தின் ஒற்றுமையை கலைக்க படாத பாடுபடுகிறார்கள்.

இதனை உணர்ந்து நான் அனைத்து முஸ்லிம் உம்மத்தின் மக்களிடமும் கேட்டுக்கொள்கிறேன், இன்றைக்கு சமூக வலைத்தளங்களில் பரவலாகப் பார்க்கும் விஷயங்களை வைத்து, அவசரமாக முடிவுகளை எடுத்து, தங்களை நாசமாக்கிக் கொள்ள வேண்டாம். அவற்றில் ஏராளமான நஞ்சுகள் உள்ளன. எதிரிகள் திட்டமிட்டு அதை நடத்துபவர்களாகவும் இருக்கிறார்கள். அதற்காக உம்மத்தைப் பிரித்து அழிக்க முயற்ச்சிப்பதையே தங்களுடைய நோக்கமாக கொண்டுள்ளார்கள்.

உதாரணமாகச் சொல்ல வேண்டுமென்றால், தமிழ் பேசும் இலங்கை மக்கள் உணர்ந்த சில விஷயங்களை நான் இங்கு முன்வைக்கின்றேன்:

நாங்கள் முஸ்லிம்களாக, சர்ச்சைகளிலும், பிரச்சனைகளிலும், சிரமங்களிலும் இருக்கும்போது, நம் நாட்டில் உள்ள ஊடகங்கள் நடந்துகொள்வதைப் பார்த்து, அவர்கள் ஒரு சம்பவத்தை எவ்வாறு நோக்குகிறார்கள் என்பது உங்களுக்கு விளங்கியிருக்கும். எவ்வாறு முஸ்லிம்களை அழிப்பதற்கு முயற்சி எடுக்கிறார்கள் என்பதை உணர்ந்திருப்பீர்கள். அதைத் தெரிந்து, நாங்கள் ஒதுங்கிக்கொண்டோம். அந்த ஊடகங்களில் வரும் விஷயங்களை செவிமடுக்காமல், காதில் போட்டுக்கொள்ளாமல் தவிர்ந்து விட்டோம். ஏன்? உண்மையான நிலையை கண்முன்னே நாங்கள் கண்டோம். முஸ்லிம்களாக எங்கள் நாட்டில் உண்மையில் என்ன நடக்கிறது? ஆனால் சொல்லப்படுவது என்ன? அவ்வாறு தான் இன்றைக்கு இருக்கும் அனைத்து சமூக வலைத்தளங்களின் நிலையும் என்பதை நீங்கள் தெளிவாக புரிந்து கொள்ள வேண்டும்.

இன்றைக்கு சமூக வலைத்தளங்கள் – Facebook, WhatsApp, Instagram – போன்ற அனைத்தும் கையிலேயே இருக்கின்றன. நம்முடைய எதிரிகள் கையிலேயே இருக்கிறார்கள். நமக்கு எதிராகத் திட்டமிடுபவனும் அதைப் பயன்படுத்துகிறான். நமக்கு ஆதரவாக இருப்பவனும் அதை பயன்படுத்துகிறான். யாரும், "நான் உன்னுடைய எதிரி" என்று வெளிப்படையாக காட்டிக்கொண்டு அதை பயன்படுத்துவது இல்லை; "நான் உன்னுடைய தோழன்" என்று பயன்படுத்துவம் இல்லை. எல்லோரும் அவர்களுடைய கருத்துகள் அல்லது குறிக்கோளை அடைய ஒரு வாய்ப்பைப் பெற்றுக்கொள்ள வேண்டும் என்பதற்காக, அனைத்தையும் ஜோடித்து சமூக வலைதளங்களில் காட்டுகிறார்கள்.

நாம் நமது ஈமானில் உறுதியாக இருந்து, நமது இஸ்லாத்தில் உறுதியாக இருந்து, நமது மார்க்கத்தைத் தெளிவாகப் படித்துவிட்டோம் என்றால், அல்லாஹ் நம்மை காப்பாற்றுவான். நமது குடும்பங்களைக் காப்பாற்றி, அல்-குர்ஆனையும் அஸ்-ஸுன்னாவையும் படித்து, அதன்படி வளர்ந்து, வாழ்ந்து, நமது வாழ்க்கையில் இஸ்லாத்தைப் பின்பற்றுவது, நாம் நடந்துகொள்ளும் வழிமுறையில் கவனாக இருப்பது போன்றவற்றிற்கு முக்கியத்துவம் காட்ட வேண்டுமே தவிர, மற்ற கதைகளுக்கும், வெளிப்புற காட்சிகளுக்கும் ஆளாகாதீர்கள்.

நாம் தரமான முஸ்லிம்களாக வாழ்ந்துவிட்டால் அதுவே உம்மத்தை நேர்வழிப்டுத்த, நாம் கொடுக்கும் மிகப்பெரிய பங்காக இருக்கும். அனைத்து சர்ச்சைகளை தடுப்பதற்கு நாம் இஸ்லாத்தை படித்து, விளங்கி, பின்பற்ற வேண்டும். நமது சமூகத்தில் அதற்கு கைகொடுக்க வேண்டும். அதை நிலைநாட்டுவதில் எங்களால் என்னென்ன முயற்சிகள் செய்ய முடியுமோ, அதற்கு நாம் பங்களிப்பவர்களாக ஆக வேண்டும். இதில், மற்றவர்கள் கூறும் பொய் கதைகள் நமது வாழ்க்கையில் தாக்கத்தை ஏற்படுத்தாமல் இருக்க வேண்டும் என்பதை தெரிந்துகொள்ளுங்கள் சகோதரர்களே!

இன்றைக்கு எத்தனையோ நஞ்சுகளை பலர் அறியாமலும், தெரியாமலும் தங்களுடைய வாழ்க்கையில் தாக்கத்தை ஏற்படுத்தும் விஷயமாக ஆக்கிக்கொள்கிறார்கள். அதன் காரணமாக அந்த நஞ்சை அவர்களே குடித்து, அவர்களே தங்களை அழித்துக்கொள்கிறார்கள். இஸ்லாமிய மார்க்கம் என்பது குர்ஆன், ஸுன்னாஹ்வின்படி:

یٰۤاَیُّهَا الَّذِیْنَ اٰمَنُوْا قُوْۤا اَنْفُسَكُمْ وَاَهْلِیْكُمْ نَارًا

ஈமான் கொண்டவர்களே! நீங்கள் உங்களையும், உங்கள் குடும்பத்தினரையும் (நரக நெருப்பைவிட்டும்) காப்பாற்றிக் கொள்ளுங்கள் (66:6)

இந்த கடமையை ஒவ்வொரு குடும்பங்களிலும் உள்ள பொறுப்பாளர்களும், குடும்பத்தை நடத்துபவர்களும் கவனித்தால் உலகம் திருந்தும், சமூகமும் திருந்தும், நாடும் திருந்தும், மக்களும் திருந்துவார்கள். வரலாறு நல்ல பாதையில் எழும்பும். இந்த கவனிப்பு இல்லை என்றால், சமூகமும் திருந்தாது, நாடும் திருந்தாது, ஒரு நலவும் நடக்காது! நாம் பல நஞ்சுகளுக்கு ஆளாகி, நம்மை அழித்துக்கொள்வதற்கு நாமே காரணமாகிவிடுவோம் என்பதைத் தெரிந்துகொள்ளுங்கள்.

இஸ்லாமிய உம்மத்தின் முன்னேற்றம் அல்-குர்ஆன், அஸ்-ஸுன்னாஹ்வைப் பின்பற்றுவதில் தான் தவிர, நமது சொந்தத் திட்டங்களினால் அது நடக்காது. நாம் சொந்தத் திட்டங்களாக சுமந்து கொள்ளும் விளக்கங்கள் எல்லாம் நமது புத்தியில் நாம் தேடிக்கொண்ட நஞ்சுகள். இதுதான் நம்மிடையே பிரிவினையை ஏற்படுத்துவதற்கு காரணமாகிறது. நமது குழப்பங்களுக்குக் காரணமாகிறது. நமது அழிவுக்குக் காரணமாகிறது.

இறக்கப்பட்ட அல்-குர்ஆன், அஸ்-ஸுன்னாஹ்வின்படி நாம் வாழ்ந்தால், ஒரு பிரிவினையும் நடக்காது, ஒரு அழிவும் ஏற்படாது, ஒரு குழப்பமும் நிகழாது! அதற்கான மக்களாக நாம் மாறச் வேண்டும்.

இந்தக் குர்ஆன், ஸுன்னாஹ்வை படித்து, விளங்கி செயல்படுபவனாக, முதலாவது நான், பின்னர் நமது குடும்பம், அடுத்து நமது தோழர்கள், பின்பு நம்முடைய சமூகம் மாற வேண்டும். அந்த ஒவ்வொரு கடமையை செயல்படுவது நமக்கு மட்டும் நன்மையல்ல, குடும்பத்திற்கு மட்டும் நன்மையல்ல. அனைத்து மனித சமூகத்திற்கும் நாம் வெளிச்சத்தை திறந்து வைத்த நன்மையை அடைந்துவிடுவோம். வெளிச்சம் தொடர்ச்சியாக இருக்கும் பொழுது இருள் அழிந்துவிடும். இருளுக்கு அங்கே பங்கு இருக்காது. எப்பொழுது வெளிச்சத்தைத் தடுத்து விடுவோமோ, அங்கே இருட்டு முந்திவிடும். மக்களை இருட்டிலேயே வைத்துவிடும். அதற்காக, முஸ்லிமாக, சத்தியத்தின் வெளிச்சத்தில் உங்களது வாழ்க்கையை ஆக்கிக் கொள்வது அவசியமாகும்.

தெரிந்த குர்ஆன், ஸுன்னாஹ்வின் சட்டங்களை வாழ்க்கையில் நடைமுறைப்படுத்துவதில் ஒவ்வொருவரும் அல்லாஹ்விற்கு முன்னால் கடமையாக நடந்துகொள்ள வேண்டும். பள்ளிவாசல்களை உயிரோடு வைத்துக்கொள்ளுங்கள். இஸ்லாமியக் கல்வியை வாழ்க்கையின் வழிமுறையாக்கிக் கொள்ளுங்கள். அல்லாஹ் தந்த தெளிவுகளையும், சட்டங்களையும், விளக்கங்களையும் சரியாக செயலபடுங்கள் இல்லையென்றால் நாளை கியாமத்தில் அது உங்களுக்கு எதிராக நின்று நரகத்தில் நுழையக் காரணமாகிவிடும். எனவே அந்த சட்டங்களை சரியாக பின்பற்றி, அஸ்ஸிராத்தின் நேரான பாதையில் அமைந்து, ஜன்னத்தில் நுழையும் பாக்கியங்களைப் பெற்றுக்கொள்வோம். ஆமீன்!

-----------------------------

அஷ் ஷெய்க் யஹ்யா ஸில்மி ஹஃபிழஹுல்லாஹ் அவர்களின் வழிகாட்டுதலில் வெளியிடப்படுகிறது

அஹ்லுஸ் ஸுன்னாஹ் அஹ்லுல் ஹதீஸ் ஸலஃப் பாதையை குறித்து தெளிவுகளுக்கு:

உஸ்தாத். அப்துஸ் ஸமது - +91 91599 69481

உஸ்தாத். மீரான் கனி - +91 90472 79622

அஷ் ஷெய்க் யஹ்யா ஸில்மி - +94722 251277

strengthening eemaan

ஈமானில் உறுதியாகினால் சமூகம் சீர்திருத்தம் பெறும்!